fbyoutube

Հիշողությունը զարգացնող

Խաղեր երեխայի հիշողությունը զարգացնելու համար

 

Լսողական հիշողության զրգացման համար աշխատեք երեխայի համար որքան հնարավոր է, շատ հեքիաթ կարդալ, երգել կամ հանգավորված բանաստեղծություններ արտասանել: Երեխան շուտով դրանք կսովորի և կվերարտադրի: Սա նպաստում է լսողական հիշողության զարգացմանը:

Տեսողական հիշողության զարգացման համար կարելի է այսպիսի խաղ խաղալ. երեխայի առջև մի քանի տարբեր ձևերի առարկաներ դրեք: Թող ուշադիր նայի: Իսկ երբ կշրջվի, թաքցրեք իրերից մեկը կամ երկուսը: Թող երեխան գուշակի, թե որ առարկան չկա: Կարելի է նաև երեխային նկարներ տալ և առաջարկել դրանք  դասավորել ըստ պատկերված թեմատիկայի` բույսեր, կենդանիներ, կառույցներ, տրանսպորտ, մարդիկ և այլն:

Շարժողական հիշողության զարգացման համար երեխային առաջարկեք Ձեր հետևից կրկնել տարբեր շարժումներ, վարժություններ: Թվում է, թե հեշտ վարժություն է, սակայն միանգամից բոլոր շարժումները կրկնելը չի ստացվի: Մի քանի շաբաթ մարզանք, և երեխան արդեն կկարողանա գերազանց կատարել առաջադրանքը:

Զգայական հիշողությունը զարգացնելու համար երեխային ցույց տվեք տարբեր նյութերից պատրաստված առարկաներ: Երեխան պետք է շոշափի այդ առարկաները, իսկ հետո փորձի փակ աչքերով, միայն շոշափելով որոշել, թե որը որ առարկան է: Այսպես նա կսովորի հիշել զգացումները:

Բառախաղ

Խաղեր 4-6 տարեկան երեխաների համար
 

Ասացեք երեխային, որ հիմա դուք թվարկելու եք որոշ բառեր, որոնք նա պիտի մտապահի: Ահա այդ բառերը. փիղ, նապաստակ, հեռուստացույց, հավ, պահարան, մուկ, գայլ, բազմոց, բազկաթոռ, արջ: Երեխան կրկնում է: Հիմա առաջարկեք նրան այդ բառերը խմբավորել: Ի՞նչն է միավորում որոշ բառեր իրար, ո՞րն է ընդհանուր հատկանիշը: (Երեխան կարող է թվարկել մի քանի հատկանիշ: Ձեր առաջադրանքն է՝ օգնել երեխային գտնել ճիշտ պատասխանը: Օրինակ՝ “Հիշիր կենդանիներին, իսկ հիմա թվարկիր կահույքի մասերը…” ): Խնդրեք երեխային, որ նորից կրկնի բառերը:  
Շղթայական բառերի մյուս օրինակները.
-ափսե, մորի, հաղարջ, պատառաքաղ, խնձոր, կաթսա, բանան, դանակ, տանձ, թեյնիկ
-տրամվայ, քիթ., հեծանիվ, տրոլեյբուս, ականջ, ճակատ, ավտոբուս, նավ, աչք, գնացք
Փորձեք կազմել ձեր բառաշղթան, ելնելով ձեր երեխայի տարիքից: Եթե երեխան հիշում է և արտաբերում է 6-7 բառ առանց խմբավորելու, ուրեմն Ձեր երեխան լավ հիշողություն ունի, իսկ եթե արագ և ճիշտ է կատարում բառերի խմբավորումը, ապա նա ունի հավասարակշված հիշողություն:  

 

Ճանաչիր առարկան

Խաղեր 4-6 տարեկան երեխաների համար

Այս խաղը շոշափողական հիշողության համար է: Կապում եք երեխայի աչքերը և հերթով նրա ձեռքն եք տալիս տարբեր առարկաներ: Բայց բարձրաձայն չեք ասում, թե ինչ է: Երբ վերջանում են առարկաները (3-10 առարկա) երեխան պիտի հերթականությամբ թվարկի առարկաները: Այս խաղը բարդ է նրանով, որ երեխան մտովի պիտի ճանաչի առարկաները և հիշի հերթականությունը:

Գտիր ինքդ

Խաղեր 4-6 տարեկան երեխաների համար


Այս խաղը զարգացնում է տեսողական հիշողությունը: Անհրաժեշտ է իրար սոսնձել լուցկու դատարկ տուփերը, որպեսզի աշտարակի տեսք ունենա: Այս ձևով ստացեք երկու աշտարակ:
Խաղի առաջին փուլում տուփերից մեկի մեջ կոճակ դրեք ու փակեք տուփը: Հարցրեք երեխային. «Ո՞ր տուփում և ո՞ր աշտարակում է կոճակը»:
Բարդացրեք խաղի երկրորդ փուլը: Նույն աշտարակի տարբեր տուփերում պահեք տարբեր առարկաներ: Խնդրեք, որ երեխան տեսողական հիշողությամբ ասի, թե ո՞ր առարկան ո՞ր տուփում և ո՞ր աշտարակում է դրված: 
Երրորդ փուլում առարկաները դրեք տարբեր աշտարակներում:
Կարող եք այս խաղը շարունակել կես ժամ հետո, կամ էլ նույնիսկ հաջորդ օրը, որպեսզի պարզեք երեխայի տեսողական հիշողությունը առավել երկարաժամկետ հատվածում:




 

Ով շատ կհիշի

Խաղ 2-6 տարեկան երեխաների համար

Հերթականությամբ ցույց տվեք տարբեր առարկաներ: Երեխաները պիտի հիշեն այդ պատկերները: Հաղթում է նա, ով ավելի շատ նկար կմտապահի: